நடிகர் அஜித்குமாரின் துணிவு படம் கடந்த மாதம் 11ம் தேதி திரையரங்குகளில் சர்வதேச அளவில் வெளியாகி ரசிகர்களை கவர்ந்துள்ளது. த்ரில்லர் ஜானரில் வங்கிக் கொள்ளையை மையமாக கொண்டு வெளியான இந்தப் படத்தை ஹெச் வினோத் இயக்கியிருந்தார். அஜித்துடன் நேர்கொண்ட பார்வை, வலிமை படங்களை தொடர்ந்து மூன்றாவது முறையாக அவர் துணிவு படத்தில் இணைந்திருந்தார். படத்தில் மஞ்சு வாரியர், சமுத்திரக்கனி உள்ளிட்டவர்கள் முக்கியமான கேரக்டர்களில் நடித்திருந்த நிலையில், படம் ரசிகர்களை வெகுவாக கவர்ந்து திரையரங்குகளில் வெற்றிகரமாக ஓடிவருகிறது. மேலும் கடந்த 8ம் தேதி படம் ஓடிடியிலும் வெளியாகி ரசிகர்களை வெகுவாக கவர்ந்துள்ளது.
நெட்பிளிக்சில் வெளியான துணிவு படம், முதல் மூன்று இடங்களை பிடித்து, அதிலும் தனது வெற்றியை வெளிப்படுத்தியது. இந்தப் படத்தை தொடர்ந்து அஜித்தின் ஏகே62 படத்தின் வேலைகள் துவங்கும் என்று எதிர்பார்க்கப்பட்டது. படத்தை விக்னேஷ் சிவன் இயக்கவுள்ளதாக கூறப்பட்டது.
ஆனால் தவிர்க்க முடியாத காரணங்களால், விக்னேஷ் சிவன் ஏகே62 படத்திலிருந்து விலகினார். இதையடுத்து படத்தை மகிழ்திருமேனி இயக்கவுள்ளது உறுதியாகியுள்ளது. இவர் அருண் விஜய்யின் கேரியர் பெஸ்ட் படங்களான தடம், தடையறத் தாக்க போன்ற படங்களை இயக்கிய நிலையில், ஏகே62 படத்திற்கான எதிர்பார்ப்பு அதிகரித்துள்ளது.
அதேபோல் அஜித்குமார் – மகிழ் திருமேனி படத்தின் அறிவிப்பு வெளியாகாமல் இருப்பதற்கான காரணமும் தெரிய வந்துள்ளது. லைகா நிறுவனம் இதுவரை 24 படங்களை தயாரித்துள்ள நிலையில், 25வது படமாக அஜித்குமார் – மகிழ் திருமேனி படத்தை தயாரிக்க உள்ளதாக தகவல் வெளியாகியுள்ளது. இதனால் இன்னும் சில நாட்களில் அனைத்து தொழில்நுட்ப குழுவினருடன் ஏகே62 படம் குறித்த அறிவிப்பு வெளியாக உள்ளது.
அதேபோல் இன்னும் சில தினங்களில் இந்தப் படத்தின் அறிவிப்பு வெளியிடப்பட்டு மார்ச் முதல் வாரத்தில் படத்தின் சூட்டிங் துவங்கும் என்றும், படத்தின் சூட்டிங், ஜூன் -ஜூலை மாதத்தில் நிறைவடைந்து தீபாவளி ரிலீசாக படம் வெளியாகும் என்றும் கூறப்பட்டுள்ளது. ஏகே 62 படத்தை ரிலீஸ் செய்துவிட்டு, சர்வதேச அளவில் தன்னுடைய பைக் சுற்றுப்பயணத்தை நடிகர் அஜித் துவங்கவுள்ளதாக தகவல்கள் தெரிவிக்கின்றன. இதற்கென படத்தின் ரிலீசையடுத்து ஒரு ஆண்டிற்கு தனது சுற்றுப்பயணத்தை அஜித் மேற்கொள்ளவுள்ளதாகவும் கூறப்பட்டுள்ளது.
