விஜய் லோகேஷ் கனகராஜ் கூட்டணி இரண்டாவது முறையாக இணைந்துள்ள திரைப்படம் லியோ. இதில் திரிஷா, சஞ்சய் தத், மன்சூர் அலிகான், அர்ஜுன், கௌதம் வாசுதேவ் மேனன் உள்ளிட்ட பல்வேறு நட்சத்திரங்கள் நடித்துள்ளனர்.
விறுவிறுப்பாக நடைபெற்ற படப்பிடிப்பு
செவன் ஸ்க்ரீன் ஸ்டுடியோ தயாரிக்கும் லியோ திரைப்படத்தின் முதல் கட்ட படப்பிடிப்பு காஷ்மீரில் தொடங்கியது. இதற்காக ஒட்டுமொத்த பட குழுவினரும் விமானத்தில் காஷ்மீர் செல்லும் வீடியோவை படக்குழு வெளியிட்டது. அதுமட்டுமல்லாமல் காஷ்மீரில் 100 நாட்கள் நடைபெற்ற படப்பிடிப்பை வீடியோவாக தயாரித்து வெளியிட்டு படக்குழு நிறுவனம் ரசிகர்களை உற்சாகப்படுத்தியது. காஷ்மீரைத் தொடர்ந்து சென்னையில் லியோ படப்பிடிப்பு விறுவிறுப்பாக நடைபெற்றது. ஆந்திர மாநிலம் தலக்கோணத்தில் நடைபெற்ற படப்பிடிப்பில், நடிகர் விஜயை காண ஏராளமான ரசிகர்கள் கூடிய காட்சி இணையத்தில் வைரலானது.
எல் சி யு வில் வருமா லியோ?
லியோ திரைப்படத்தின் சூட்டிங் தொடங்கிய நாளிலிருந்தே, அந்தத் திரைப்படம் எல் சி யு வில் வருமா என ரசிகர்கள் கேள்வி எழுப்பி வருகின்றனர். கார்த்தியின் கைதி படத்தை எடுத்த லோகேஷ் கனகராஜ், அதில் உள்ள சில முடிச்சுகளை விக்ரம் படத்திலும் தொடர்ந்து வந்தார். குறிப்பாக இறுதி காட்சியில் சூர்யா, ரோலக்ஸ் கதாபாத்திரத்தில் அறிமுகமானது ரசிகர்களிடையே பெரும் வரவேற்பை பெற்றது.
லோகேஷ் கனகராஜின் இந்த எல் சி யு – யுக்தி நன்றாக இருப்பதாக ரசிகர்கள் கருத்து தெரிவித்தனர். தற்போது விஜயின் லியோ திரைப்படமும் எல் சி யு வாகவே இருக்க வேண்டும் என அவர்கள் விரும்புகின்றனர். இது தொடர்பாக தினமும் சமூக வலைதளத்தில் ஏதாவது ஒரு பதிவை இடும் அவர்கள், லோகேஷ் கனகராஜின் பதிலுக்காக காத்திருக்கின்றனர்.
பட்டித் தொட்டி எங்கும் ஹிட்டடித்த நா ரெடி பாடல்
நாளுக்கு நாள் படத்தின் மீதான எதிர்பார்ப்பு அதிகரித்து வரும் நிலையில், விஜய்யின் பிறந்தநாளை முன்னிட்டு நா ரெடி பாடல் வெளியானது. நடிகர் விஜய் இந்த பாடலை பாடியிருக்கிறார். 2000 நடன கலைஞர்களுடன் பிரம்மாண்டமாக உருவாகி இருக்கும் பாடல் ரசிகர்களிடையே பெரும் வரவேற்பு பெற்று இருக்கிறது. லோகேஷ் கனகராஜின் உதவி இயக்குனரான விஷ்ணு எடவன் எழுதியிருக்கும் பாடல்களின் வரிகளும் புதுவித அனுபவத்தை தந்துள்ளது.
கனவு படம் இரும்புக் கை மாயாவி
லியோ திரைப்படம் வரும் அக்டோபர் 19ஆம் தேதி திரையரங்குகளில் வெளியாகிறது. இந்நிலையில் கோவையில் செய்தியாளர்களிடம் பேசிய இயக்குனர் லோகேஷ் கனகராஜ், விஜய்யின் வேலை குறித்து பேச வார்த்தைகளே இல்லை என்று நெகிழ்ந்தார். தொடர்ந்து பேசிய அவர், லியோ படத்தின் போஸ்ட் புரொடக்ஷன் பணிகளுக்கு நீண்ட காலம் தேவைப்படுகிறது. இதனால்தான் ஜூன் மாதமே படப்பிடிப்பை முடித்து விட்டோம். அடுத்த மூன்று மாதங்களில் போஸ்ட் ப்ரொடக்ஷன் பணிகள் நடைபெறும். இந்த படத்தை ரசிகர்களிடம் கொண்டு சேர்க்க ஆர்வமாக உள்ளேன். எனது கனவு படம் என்பது இரும்பு கை மாயாவி தான். இதற்காக பத்து ஆண்டுகளுக்கு முன்பே கதை எழுதினேன். விரைவில் ஆகும் என்று நம்புகிறேன் என தெரிவித்தார்.
