நடிகர் சூப்பர் ஸ்டார் ரஜினிகாந்த் நடித்து வெளிவந்த ஜெய்லர் திரைப்படம் ரசிகர்கள் மத்தியில் உற்சாக வரவேற்பை பெற்றிருக்கிறது. தர்பார், அண்ணாத்த திரைப்படத்திற்கு பிறகு சூப்பர் ஸ்டார் ரஜினிகாந்த் தன்னுடைய வழக்கமான கம்பேக்கை கொடுத்திருக்கிறார்.
படம் பார்த்து திரையரங்குகளில் இருந்து வெளியே வருபவர் எல்லாம் ரஜினி ரசிகர்களாகவே ஆகி இருப்பார்கள். அந்த அளவிற்கு படம் மிகப்பெரிய தாக்கத்தை ஏற்படுத்தியிருக்கிறது. இந்த நிலையில் ஜெய்லர் திரைப்படத்தின் முதல் நாள் வசூல் என்ன என்று தற்போது பார்க்கலாம்.
ஜெய்லர் திரைப்படம் தமிழ்நாட்டில் மட்டும் முதல் நாளில் எந்த சிறப்பு காட்சிகளும் இல்லாமல் 24 கோடி ரூபாய் வசூலை பெற்றிருக்கிறது. இதே போன்று கேரளாவில் 6 கோடி ரூபாயும்,கர்நாடகாவில் 10 கோடி ரூபாயும், ஆந்திரா தெலுங்கானாவில் 10 கோடி ரூபாய் வசூலையும் ஜெய்லர் படைத்திருக்கிறது.
இதேபோன்று இந்தியாவைத் தவிர வெளி நாடுகளில் ஜெயிலர் திரைப்படம் 22 கோடி ரூபாய் வசூலை படைத்திருக்கிறது. இதில் அமெரிக்காவில் மட்டும் 11 கோடி ரூபாய் வசூல் ஜெய்லர் பெற்று இருக்கிறது.
இதன் மூலம் ஒட்டுமொத்தமாக முதல் நாளில் 72 கோடி ரூபாயை ஜெயிலர் படைத்திருக்கிறது. இதன் மூலம் நடப்பாண்டில் வெளியான தமிழ் திரைப்படங்களில் அதிக வசூலை முதல் நாளில் குவித்த திரைப்படம் என்ற பெருமையை ஜெய்லர் படைத்திருக்கிறது.
சிறப்பு காட்சிகள் இல்லாமலேயே இவ்வளவு வசூலை ஜெய்லர் குவித்திருக்கிறது. சிறப்பு காட்சிகள் மட்டும் இருந்திருந்தால் 100 கோடியை கடந்து இருக்கும் என திரைப்பட நிபுணர்கள் கருத்து தெரிவித்துள்ளனர். மேலும் ஜெய்லர் படத்தில் விமர்சனமும் சிறப்பாக இருப்பதால் படத்தின் வசூல் மேலும் அதிகரிக்கும் என்றும் கூறுகின்றனர்.
தற்போது தமிழ்நாட்டின் அதிக வசூல் குவித்த திரைப்படம் என்றால் அது பொன்னியின் செல்வனும், விக்ரமும் தான். இந்த சாதனையை ஜெயிலர் முறியடிக்கும் என்று திரைத்துறை நிபுணர்கள் கூறியுள்ளனர்.
