கே.ஜி.எஃப் இயக்குநர் பிரசாந்த் நீல் இயக்கத்தில் பிரபாஸ் நடித்துள்ள சலார் திரைப்படத்தின் டீசர் குறித்த முக்கிய தகவல் வெளியாகியுள்ளது.
தெலுங்கு சினிமாவின் முன்னணி நடிகரான பிரபாஸ், ராஜமெளலியின் பாகுபலி படத்திற்கு பின்னர், பலரால் கவனிக்கப்பட்டார். பாகுபலி படத்தின் வெற்றியை அடுத்து, பிரபாஸின் படங்கள் எதிர்பார்த்த வரவேற்பை கொடுக்கவில்லை. சாஹோ, ராதே ஷ்யாம் போன்ற படங்களை தோல்வியை தழுவின.
இருப்பினும் பிரபாஸின் ரசிகர் பட்டாளம் தொடர்ந்து அவரது படத்தை கொண்டாடி வருகின்றனர். இதனிடையேதான் ராமாயணத்தை கதைக்களமாக கொண்டு பிரபாஸ் நடித்துள்ள ஆதிபுருஷ் படத்திற்காகவும் ஆவலாக காத்திருந்து வருகின்றனர்.
பிரமாண்ட பொருட்செலவில் உருவான ஆதிபுருஷ் திரைப்படம், ஜூன் 16ஆம் தேதி திரையரங்குகளில் வெளியாகிறது. இந்த படத்தின் அனிமேஷன் காட்சிகளை பலரும் கடுமையாக விமர்சித்தனர். குழந்தைகள் பார்க்கும் கார்டூன் போல காட்சிகள் இருப்பதாகவும் கிண்டலடித்தனர்.
இதற்கிடையே, கே.ஜி.எஃப் படத்தின் மூலம் பெரிய அளவில் கவனத்தை ஈர்த்த பிரசாந்த் நீல் இயக்கத்தில் சலார் என்ற படத்தில் பிரபாஸ் கதாநாயகனாக நடித்து வந்தார். பிரபாசுடன் இணைந்து மலையாள நடிகர் ப்ரித்திவிராஜ் வில்லனாக நடிக்கும் சலாம் படத்தில் ஸ்ருதி ஹாசன் கதாநாயகியாக நடிக்கிறார்.
ஆதிபுருஷ் படத்திற்கு பெரிய அளவில் எதிர்பார்ப்பு இல்லை என்றாலும், சலார் படத்திற்கு இந்திய அளவில் எதிர்பார்ப்பு எகிறியிருக்கிறது. இந்த திரைப்படம் செப்டம்பர் 28ஆம் தேதி உலகளவில் வெளியாகும் என அறிவிக்கப்பட்டுள்ளது.
இந்தநிலையில்தான் பிரசாந்த் நீல்-பிரபாஸ் கூட்டணியில் உருவான சலார் படத்தின் முக்கிய அப்டேட் ஒன்று வெளியாகியுள்ளது. அதன்படி சலார் படத்தின் டீசர் ஜூன் 16ஆம் தேதி வெளியாகும் என அறிவிக்கப்பட்டுள்ளது. அதேநாளில் தான் விமர்சனங்களுக்கு உள்ளான பிரபாசின் ஆதிபுரூஷ் திரைப்படமும் உலகளவில் வெளியாகவுள்ளது குறிப்பிடத்தக்கது.
